Abu Nasar Saied Ahmed

আবু নাছাৰ চাঈদ আহমদ, জন্ম : ১৯৪৯

গ্ৰন্থকাৰ আহমদে কটন কলেজৰ পৰা ৰাজনীতিবিজ্ঞানত প্ৰথম শ্ৰেণীৰ দ্বিতীয় স্থান লাভ কৰি গুৱাহাটী বিশ্ববিদ্যালয়ৰ পৰা একে বিষয়তে স্নাতকোত্তৰ পৰীক্ষাত প্ৰথম স্থান অধিকাৰ কৰি সোণৰ পদক অৰ্জন, আৰু পাছত পি এইচ ডি ডিগ্ৰী লাভ কৰিছিল৷ তেওঁ ডিব্ৰুগড় বিশ্ববিদ্যালয়ত ৰাজনীতিবিজ্ঞান বিভাগত সুদীৰ্ঘ দুটা দশক অধ্যাপনা আৰু গৱেষণা কৰিছিল৷ তাত থাকোঁতেই আমেৰিকাৰ Fulbright Post-Doctoral Fellowship লাভ কৰি University of Illinois at Urbana-Champaignত (১৯৮১-১৯৮২) গৱেষণা কৰিছিল৷ তেওঁ জাকাৰ্টাস্থিত Indonesian Institute of Sciences (LIPI), কুৱালালামপুৰৰ Universiti Putra Malaysia, ছিংগাপুৰৰ Institute of Southeast Asian Studies আৰু ঢাকাত থকা Asiatic Society of Bangladeshত ভিজিটিং ফেল’ হিচাপে যোগদান কৰিছিল৷ শেহতীয়াকৈ আই আই টি, গুৱাহাটীত ‘ভিজিটিং প্ৰফেছাৰ’ আৰু University of Science and Technology, Meghalayaত Dean, School of Social Science হিচাপে অধ্যাপনা কৰিছিল৷ সম্প্ৰতি কৃষ্ণকান্ত সন্দিকৈ ৰাজ্যিক মুক্ত বিশ্ববিদ্যালয়ত থকা বাণীকান্ত কাকতি গৱেষণা কেন্দ্ৰৰ অবৈতনিক সঞ্চালক আৰু গুৱাহাটীস্থিত Centre for Development and Peace Studiesৰ অবৈতনিক 'Director Research' হিচাপে কাৰ্যনিৰ্বাহ কৰি আছে৷ তেওঁ বিভিন্ন বিষয়ত তিনিশৰো অধিক ইংৰাজী আৰু অসমীয়া জনপ্ৰিয় প্ৰবন্ধ, চল্লিশখন গৱেষণা নিবন্ধ, সোতৰখন গৱেষণামূলক গ্ৰন্থ, হো চি মিনৰ কবিতাৰ অনুবাদ আৰু কাৰ্ল মাৰ্ক্সৰ পত্নী জেনী মাৰ্ক্সৰ জীৱনী প্ৰকাশ কৰিছে৷